Cymdeithas
dros Ddiagnosau, Ymyriadau a Chamlyniadau Nyrsio Ewropeaidd Cyffredin
Corff Aelodaeth
yw'r Gymdeithas dros Ddiagnosau, Ymyriadau a Chanlyniadau Nyrsio Ewropeaidd
Cyffredin a sefydlwyd ym 1995 i hybu datblygiad iaith broffesiynol nyrsio
a darparu rhwydwaith ar draws Ewrop ar gyfer nyrsys sydd â diddordeb
mewn datblygu iaith gyffredin i ddisgrifio ymarfer nyrsio.
Mae angen
i nyrsys ar draws Ewrop allu rhannu a chymharu gwybodaeth ynghylch ymarfer
er mwyn ymchwilio i mewn i ofal a'i wella, rheoli adnoddau nyrsio'n
effeithiol a sicrhau bod nyrsio yn weladwy mewn polisi lleol, cenedlaethol
ac Ewropeaidd.
I wneud
hyn mae angen iddynt yn gyntaf allu mynegi, yn eu hiaith hwy eu hunain,
beth y maent yn ei wneud ar gyfer cleifion a chleientiaid, pam, a beth
yw'r canlyniadau. Wedyn mae'n rhaid iddynt allu rhannu a chymharu eu
hymadroddion gyda rhai nyrsys eraill drwy derminoleg gyffredin, wedi
ei safoni, sy'n sicrhau bod tebyg yn cael ei gymharu gyda'i debyg. Mae'n
rhaid i iaith broffesiynol Nyrsio gwmpasu holl ystod ac amrywiaeth gofal
cyfannol unigol: nid oes a wnelo datblygu'r iaith hon â safoni
gofal, ond â chyrraedd safonau ar gyfer y ffordd yr ydym yn mynegi
nyrsio.
Mae nyrsys
yn rhai o wledydd Ewrop yn datblygu terminolegau i gyfarfod ag angen
eu gwlad am iaith nyrsio. Mae eraill wedi addasu neu gyfieithu terminolegau
a dosbarthiadau sydd wedi eu datblygu mewn gwledydd eraill neu gan ddisgyblaethau
eraill, ond nid oes cydlynu cyffredinol wedi bod ar y datblygiadau hyn
rhwng gwledydd.
Mae gan
ddosbarthiadau rhyngwladol botensial ar gyfer nyrsio: mae nyrsys mewn
rhai gwledydd yn defnyddio Dosbarthiad Rhyngwladol Namau, Gweithgareddau
a Chyfranogi (International Classification of Impairments, Activities
and Participation) (ICIDH). Mae Cyngor Rhyngwladol y Nyrsus wedi dechrau
datblygu'r ICNP, sef Dosbarthiad Rhyngwladol Ymarfer Nyrsio (International
Classification of Nursing Practice).
Mae ACENDIO
yn cefnogi'r broses hon drwy ddarparu:
- Cynadleddau,
cyhoeddiadau a chyflwyniadau i hybu dealltwriaeth a gwaith yn y maes
hwn
- Rhwydwaith
ar gyfer nyrsys yng ngwahanol wledydd Ewrop fel y gallant rannu gwybodaeth
ynghylch datblygiadau
- Adnoddau
megis rhestri cyfeirio a methodolegau enghreifftiol ar gyfer datblygu
a gwerthuso geirfaoedd nyrsio
- Dehongli
safonau Rhyngwladol ar gyfer terminolegau a dosbarthiadau