Velkomin á vefsíður

ACENDIO

ACENDIO eru Evrópsk samtök um þróun sameiginlegs fagmáls hjúkrunarfræðinga í Evrópu, fagmáls sem inniheldur hjúkrunargreiningar, hjúkrunarmeðferðir, og árangursmælingar fyrir hjúkrun.

 

ACENDIO eða, "The Association for Common European Nursing Diagnoses, Interventions and Outcomes" eru félagssamtök sem stofnuð voru árið 1995 til þess að stuðla að þróun á fagmáli hjúkrunar og mynda evrópskt samskiptanet hjúkrunarfræðinga sem hafa áhuga á þróun fagmáls sem lýsir hjúkrun.

Hjúkrunarfræðingar um alla Evrópu þurfa sameiginlegt fagmál til að geta miðlað sín á milli og borið saman upplýsingar um hjúkrun, til þess að geta rannsakað og bætt hjúkrunarþjónustu og til að geta lýst stjórnun hjúkrunar. Sameiginlegt fagmál hjúkrunar er nauðsynlegt til að tryggja að hjúkrun verði sýnileg í heilbrigðisþjónustu, og hjúkrunarupplýsingar verði hafðar til hliðsjónar þegar teknar eru stefnumótandi ákvarðanir um heilbrigðisþjónustu á hverri stofnun, í hverju landi og síðast en ekki síst þegar mörkuð er stefna hjúkrunar á evrópskum vettvangi.

Til að svo megi verða, þurfa hjúkrunarfræðingar að geta lýst á eigin fagmáli hvað það er sem hjúkrunarfræðingar gera fyrir sjúklinga sína og skjólstæðinga, hversvegna þeir gera það og hver er árangur starfsins. Hjúkrunarfræðingar verða einnig að geta lýst starfi sínu fyrir öðrum og borið saman verkefni hjúkrunarfræðinga með notkun sameiginlegs, staðlaðs orðasafns (fagmáls) sem tryggir gildan samanburð á viðfangsefnum hjúkrunar á mismunandi stöðum og í mismunandi löndum.

Fagmál hjúkrunar þarf því að geyma safn orða og hugtaka sem endurspegla fjölbreytt verkefni einstaklingshæfðrar hjúkrunar eins og hún er stunduð um alla Evrópu. Þróun fagmáls í hjúkrun snýst þannig ekki um að staðla hjúkrunarþjónustu, heldur um að staðla þau orð og þau hugtök sem við notum til að lýsa þeirri hjúkrunarþjónustu sem við veitum

Í nokkrum löndum Evrópu hafa hjúkrunarfræðingar hafið þróun fagmáls til að mæta þörfum hjúkrunarfræðinga í viðkomandi landi. Í öðrum löndum Evrópu hafa hjúkrunarfræðingar þýtt og staðfært erlend fagmál hjúkrunar eða jafnvel fagmál annarra heilbrigðisstétta og aðlagað þörfum hjúkrunarfræðinga í viðkomandi landi. Lítið samræmi er í þróun þessar mála í hinum ýmsu löndum Evrópu.

Alþjóðleg flokkunarkerfi bjóða upp á ýmsa kosti fyrir hjúkrunarfræðinga. Þannig styðjast hjúkrunarfræðingar í nokkrum löndum Evrópu við "The International Classification of Impairments, Activities and Participation (ICIDH) sem þróað hefur verið af Alþjóðaheilbrigðismálastofnuninni (WHO). Alþjóðaráð hjúkrunarfræðinga hefur hafið þróun á alþjóðlegu fagmáli og flokkunarkerfi hjúkrunar, eða ICNP (the International Classification of Nursing Practice).

 

ACENDIO styður þróun sameiginlegs fagmáls hjúkrunar m.a. á eftirfarandi hátt:

• Með ráðstefnum, útgáfustarfsemi og fyrirlestrahaldi til að auka þekkingu og stuðla að þróun fagmáls hjúkrunar í Evrópu.
• Samtökin mynda samskiptanet evrópskra hjúkrunarfræðinga svo þeir geti miðlað sín á milli og til annarra, þekkingu og fréttum af þróun í málefnum staðlaðs og samræmds fagmáls hjúkrunar.
• Með heimildasafni og dæmum um aðferðir til að þróa og meta orðasöfn og flokkunarkerfi í hjúkrun.
• Með mati og túlkun á alþjóðlegum stöðlum fyrir orðasöfn og flokkunarkerfi.